Tegese Guru Gatra Yaiku
Tegese Guru Gatra
Guru gatra yaiku cacahing larik utawa baris ing tembang macapat. Bahas guru gatra, uga bahas tembang macapat. Tembang macapat yaiku salah sawijing tembang kang ngrembaka ing tlatah Jawa kang nduweni sawenehing paugeran. Paugeran-paugeran ing tembang macapat iku cacahe ana telu, yaiku guru lagu, guru gatra lan guru wilangan. Artine guru ing tembang macapat yaiku uger-uger, wewaton, paugeran, pathokan. Tembang macapat ana kang diarani yen macane papat-papat, sing dimaksud yaiku macane saben patang wanda (suku kata).
Macapat iku cacahe ana 11 metrum, yaiku :
- Mijil,
- Maskumambang,
- Kinanthi,
- Sinom,
- Asmaradana,
- Gambuh
- Dhandanggula,
- Pangkur,
- Durma,
- Megatruh, lan
- Pucung
Saben metrum macapat kasebut nduweni paugeran panulisan lan cara nembangake kang seje. Ing saben metrum iku nduweni cengkok sing akeh. Maneka warnane cengkok kasebut dumadi awit kreativitase masyarakat Jawa minangka kang nduweni tembang macapat kasebut.
Struktur Tembang Macapat
Struktur tembang macapat kebagi dadi telu yaiku, Guru Lagu, Guru Gatra lan Guru Wilangan.
Guru Lagu
Guru Lagu yaiku tibaning swara ing saben pungkasaning gatra. Tuladhane ing ngisor iki,
Macapat Mijil
Geter pater dhedhet herawati, (i)
Kilat thathit mawor, (o)
Obar-abir ambabae pinggire, (e)
Kelap-kelap kelamban belani, (i)
Lelidhah lumidhih, (i)
Sang Kusuma ngaduh. (u)
Sing kalebu guru lagu ing macapat mijil yaiku, i,o,e,i,i,u
Guru Gatra
Guru gatra yaiku cacahing larik utawa baris ing tembang macapat. Tuladhane ing ngisor iki,
Macapat Mijil
Geter pater dhedhet herawati, (baris 1)
Kilat thathit mawor, (baris 2)
Obar-abir ambabae pinggire, (baris 3)
Kelap-kelap kelamban belani, (baris 4)
Lelidhah lumidhih, (baris 5)
Sang Kusuma ngaduh. (baris 6)
Dadi macapat mijil iku uga nduweni 6 guru gatra utawa baris.
Guru Wilangan
Guru wilangan tegese cacahing wanda ing gatra-gatrane tembang. Tuladhane ing ngisor iki,
Macapat Mijil
Geter pater dhedhet herawati, (10)
Kilat thathit mawor, (6)
Obar-abir ambabae pinggire, (10)
Kelap-kelap kelamban belani, (10)
Lelidhah lumidhih, (6)
Sang Kusuma ngaduh. (6)
Maksud wanda utawa suku katane iku ngene, Ge-ter-pa-ter-dhe-dhet-he-ra-wa-ti. Dadi kabehe guru wilangan ing gatra siji macapat mijil ing nduwur iku 10.
0 Response to "Tegese Guru Gatra Yaiku"
Post a Comment